面試時，最注重面試者的甚麼表現？是舉止是否得體？是口才是否了得？是坐姿是否端正？還是...是否誠實？
網上流傳着一則有關特斯拉（Tesla）行政總裁馬斯克的故事：話說馬斯克在面試求職者時，會問對方一條簡單的問題，「你工作生涯遇過最棘手的問題是甚麼？你又如何去解決？」據說馬斯克是希望藉此了解求職者是否誠實，因為吹噓自己的豐功偉績容易，但憑空捏造一段跌宕起伏的經歷卻很困難。用一條問題便抽查出「面試騙子」，確保任用的都是真材實料的人才。
看到這個「職場雞湯」味甚濃的故事，筆者心中即時產生了不少疑問，姑且不去求證每秒幾十萬上落的馬斯克，是否真的會抽空會面見求職者；我反而最想知道，馬斯克／面試官／人力資源／HR 是否真心認為，求職者會在面試過程中完全誠實、絕無半分虛言？假如面試者必須完全講真話，面試又會變成怎麼？以下會告訴大家，「真實世界」和「誠實世界」面試時發生的故事。
「你啱啱大學畢業，又無工作經驗，你可能唔係好啱做呢份工...」
真實世界：雖然我無正式嘅工作經驗，但我中學畢業後就開始做 part-time，從事過好多唔同行業工作，大學時又有參與好多唔同活動，仲去咗兩次實習，呢啲經歷對我投身職場好有幫助㗎，我有信心可以應付到呢份工作。
誠實世界：個嗰好似你咁諗唔請我，咁我呢一世都唔會有工作經驗啦？同埋，我份 CV 咪寫得好清楚我畢業幾耐、無返過工囉，點解你仲叫我過嚟 in？你好得閑呀？我啲時間唔係時間啊？
「我哋公司成日都要OT，對你嚟講有冇困難？」
真實世界：我覺得OT代表公司業務好蓬勃，作為團隊一份子我當然願意加班工作。如果我順利獲聘，我會喺公司附近搵地方住，咁OT夜啲都唔係問題。
誠實世界：OT有冇錢先？無？咁我返工遲幾個鐘對公司嚟講有冇困難？
「你點解覺得自己適合呢份工？」
真實世界：我覺得自己對工作嘅理念，同貴公司嘅價值觀好吻合，而且我以往嘅學歷同工作經歷，都可以喺呢個工作崗位發揮到，如果我有幸加入貴公司，我有信心為公司帶來正面影響。
誠實世界：你請人，我搵緊工，咁咪叫適合囉。我本身有工返緊嘅話，就梗係唔適合啦。
「你啱啱入行，我哋 meet 唔到你嘅 expert salary，你有冇問題？」
真實世界：我明白自己比較 green，但我有信心同能力，展示到畀公司睇我嘅價值，從而調整返我嘅收入。
誠實世界：
「你做嘢咁耐以嚟遇過最棘手嘅問題係乜？你又點樣去解決？」
真實世界：我試過為咗入校 program 同團隊一齊籌備咗好耐，但因為疫情問題，所有活動都要取消，心血一下子無晒。不過我哋都用最短嘅時間諗出替代方案，例如唔同嘅 online 活動，feedback 都相當唔錯。
誠實世界：你知唔知一個人肚痛到就嚟爆嘅時候，就算喺個得幾度嘅冷氣房，佢都會痛到成頭都係汗。點解我知？因為我試過囉。嗰次仲要撞着開會，一路聽住老細講嘢一路夾實仲要一路控制住臉部表情，都不知幾驚險！好彩我跑得夠快去到廁所，咪順利解決到囉！不過...
誠實固然係美德，但百分之百、毫無雜質的誠實，未必是人與人交流的完美應對。在面試時，我們可以在沒有欺瞞的情況下，稍為粉飾一下自己的想法和過去，務求令面試官留下最好的印象。千萬不要抱僥倖心態謊言盡出，即使最終獲聘，沒有實際能力的你也極有可能在工作過程中「露底」，也就沒有前途可言了。
最後，以筆者十分喜歡的一則面試漫畫作結。相信這是不少求職者心中的真實願望。
文︱太宰治虫
不要絕望，就此告辭
文章轉載自I am…青年職學平台
Comments