大學嗰陣，好多同學都有返 Part-time，強積金自自然然都會成為大家嘅話題。有次成班同學討論點揀強積金，最得意係出現咗兩派極端：一係揀哂最進取，一係揀哂最保守。
雖然話強積金受到積金局所監管，以退休為目的嘅股票基金再進取都唔會有太大波幅，但始終受到大市所影響，股災、經濟轉差，都依然可以將本身嘅強積金捲走一大截。而且股災都唔知之後會有幾多次，嚟得密唔密。
進取派覺得，自己後生，仲輸得起嘅。輸咗咪之後慳啲，用其他投資工具儲錢。
但好多同學都寧願揀做保守派，100%「all in」保守基金。當然唔係多人揀就好，純粹係大家唔知點揀，但心諗返工都有血有汗，如果筆錢係因為自己投資失利，已經夠肉赤，而強積金仲要係交俾唔知邊個投資，真係寧願唔好搞筆錢好過。
係嘅，去到退休嗰陣，帳面無錯係無咩點輸贏，但係通脹會令到實際嘅購買力降低，如果每年都跑輸通脹2%，退休嗰陣衰起上嚟甚至可以無咗一半購買力。以為避緊險，其實只不過係硬食個風險。
雖然大家係兩個極端，但兩種都有個共同心態：打定輸數。
皆因強積金要直到退休先可以拎返出嚟，就算再多法例、機構監管，一項流動性低、時間太長嘅投資本質上就係高風險。而且因為「強制性」，所以大家心態上好容易唔當筆錢係自己咁，亦引致大家主動關心強積金嘅意欲好低。
諗返填 form 交表俾 HR 嘅畫面，可能十五分鐘都唔使。就算有基金報表睇，睇落都好似差唔多，幾乎朝早填完，下晝都唔記得填過咩。然後旨意呢十五分鐘落嘅選擇，去決定六十五歲之後嘅生活質素？
其實揀「進取／保守」之前，一直有個盲點：流動性低、時間長所帶嚟嘅風險，都可以靠自己大大降低──你可以轉基金架嘛！
呢樣嘢其實個個都知，但實際上大部份人都無檢討自己強積金表現嘅動力同習慣。因為自己唔擺心機，令到自己強積金嘅不確定性增加，不確定性愈大，愈無心機去理...如果唔盡早停止個惡性循環，喺複式效應之下，最後就咁少賺幾廿萬甚至百萬都唔出奇。
所以揀強積金，並唔係十五分鐘揀晒就由佢放置幾廿年，而係要 keep 住睇返基金表現，依表現再 fine tune。當然揀得進取嘅策略，就要密啲檢討自己個強積金組成喇。
當然每個人性格背景唔同，唔可以話揀「進取」或者「保守」一定好啲。但如果仲讀緊書嘅，強積金係有限數嘅話，不妨進取少少，唔係為咗賺錢，而係驅使自己盡早學習投資，及養成主動管理強積金嘅習慣，咁將來管理強積金以及做其他投資，就更加得心應手！
作者簡介：和靖
正義或許會遲到，但絕不會缺席。
文章轉載自I am…青年職學平台
Comments