平時我哋決定買唔買一樣產品／服務嗰陣，都係會理性咁諗過度過。但我哋面對無法避免嘅廣告、親友喺社交媒體嘅分享，再加上依家網購嘅方便程度…誘惑實在太多喇！而呢啲誘惑係會引發「衝動消費」：由情緒主導消費決定。
相信大家都試過，未買嗰陣就周身唔舒服咁，買嗰一下衝動係好爽，到之後醒嗰一下，通常就會好後悔！
當然可以用意志力忍手唔買，但當陷入「決策疲勞」，意志力不足嘅時候，就抵擋唔到呢啲盲目嘅衝動。所以幾堅定嘅人，都可能成為衝動消費嘅受害者。
衝動消費往往就係破壞儲錢計劃嘅「元凶」。要點樣阻止呢？方法其實超級簡單：
假設你每月要儲$5000，平時就出糧之後慢慢搣，務求月尾用剩差唔多$5000；依家調返轉，你先硬性扣起$5000儲起，剩返幾多，就係日常嘅洗費。
以硬性「先儲錢，後消費」嘅模式，就可以大大減少衝動消費。原因主要有四點：
1. 基本嘅預算
你要儲起筆錢之前，都要知道剩返嘅錢夠唔夠用。於是自自然然會預一段時間（例如一星期）嘅洗費係幾多，又或者預計要買咩物品。即使幾籠統都好，都係有框架、有清單、有計劃。正因為有充份嘅預算，所以「衝動消費」這些計劃以外嘅產物，就會相應減少。
2. 開始記帳
亦因為有預算規劃，當然會開始記帳。清楚自己洗費嘅走向，亦都好清晰衣食住行邊部份消費佔多少，即使面對「衝動消費」嘅壓力，都可以根據返自己紀錄，就更有說服力證明「衝動消費」無迫切需要。
3. 後果即時現型
如果手頭鬆動，「衝動消費」嗰一下係唔會有太大感覺。到最後先知使大咗，後果係一次過承受返。
但做好預算，如果放任自己「衝動消費」，會好快好直接影響其他洗費嘅分配。例如依家一時衝動買咗件唔係好必要嘅衫，今晚就會唔夠銀兩參加同學聚會。由於後果即刻睇到，就會迫自己消費更加審慎。
4. 更長冷靜期
因為受到預算限制，所以咁就有時間緩衝，將衝動降到最低。直到冷靜之後，問返自己：「我係咪真係需要？」、「有無替代品呢？」唔再衝動，就會醒覺自己差啲中招，順利懸崖勒馬。
總結
其實「先儲錢，後消費」、「預算規劃」係好老生常談。方法好簡單，但係知易行難，初頭只要堅持唔放棄，慢慢成為習慣嘅話，無論金錢定係心理方面，都可以幫你減少好多煩惱呢！
作者簡介：和靖
正義或許會遲到，但絕不會缺席。
文章轉載自I am…青年職學平台
Comments